போன நூற்றாண்டின் தொடக்கத்தில் ஆழ்கடலில் மூழ்கிச் சிதிலமடைந்து கூழாகிக் கரைந்துபோன டைட்டானிக் கப்பலை வேடிக்கைப் பார்க்க அப்படி என்னதான் இருக்கும்? The White Star Line என்ற கம்பனிக்குச் சொந்தமான அந்தக் கப்பலின் கட்டுமான உள்ளரங்க வரைபடத்தை ஆதாரமாக வைத்துத்தான் Titanic ஆங்கிலத் திரைப்படத்தில் தத்ரூபமாய் செட் போட்டு நிறைவாகக் காட்டினார்கள்.
ஏப்ரல் 15, 1912 அன்று இரவு நடந்தது ஒரு பயங்கரம். ஆயிரக் கணக்கானோர் ஜல சமாதி ஆன வட அட்லாண்டிக் கடல் பகுதி இன்றும் பீதியைக் கிளப்பும். ஆழ்கடல் கல்லறை தேசத்தில் பல அமானுஷ்ய சம்பவங்கள் எப்போதும் நடப்பதுதான். சில நிகழ்வுகள் செய்தியில் வரும் சில வராது.
கடலில் மட்டுமல்ல பூமியிலும் இதை ஒத்த இடங்கள் இயல்பாகவே இருக்காது. அதுபோன்ற இடங்களுக்குச் சுற்றுலா போக எவருமே தயங்குவார்கள். அங்கே முன்னொரு சமயம் ரோபோவை அனுப்பி அது எடுத்து அனுப்பிய நேரடி காணொளி காட்சியை டிஸ்கவரி சானலில் நள்ளிரவு தாண்டி ஒளிபரப்பினர். நானும் விடிய விடிய பார்த்து வியந்தேன்.
அண்மையில் நடந்த Ocean Gate சப்மரீன் ஆழ்கடல் விபத்து விவாதமாகிவிட்டது. இதற்கு முன் கடந்த காலத்தில் சென்று வந்த வண்டிகள் இவ்வளவு ஆழத்திற்குச் சென்றதில்லையாம். அதனால் அதீத அழுத்தத்தால் அசம்பாவிதங்கள் எதுவும் நடக்கவில்லை. திமிங்கிலங்களேகூட தனக்குத் தோதான குறைந்த அழுத்த எல்லைக்குள்தான் பிரவேசிக்குமாம்.
விஞ்ஞான தொழில்நுட்பம் நவீனமாக முன்னேறினாலும் இயற்கையை அவை எப்போதும் ஏய்த்துவிட முடியாது. புரியாத கணித்து விடை காணமுடியாத புதிர்கள் பல உண்டு. பழவேற்காடு ராயபுரம் பகுதி மீனவர்கள் தங்களுக்கு நடுக்கடலில் ஏற்பட்ட திகிலான அமானுஷ்யங்களை விளக்கும் காணொளியைப் பல வருடங்களுக்கு முன் பார்த்துள்ளேன். அவர்கள் சொன்ன விஷயங்களைப் பலர் நம்பமாட்டார்கள்.
கடல் என்பது மாபெரும் ரகசியத்தைக் தன்னுள் வைத்துள்ள பெட்டகம். ஆழ்கடல் தன்மையறிந்து தண்ணீரின் நிறமறிந்து அதன் பண்புகளையும் கண்ணுக்குத் தெரியாத கொல்லக்கூடிய ஆபத்தையும் நோட்டமிட்டபின்தான் அதில் பயணிக்க, குதிக்க, முத்தெடுக்க, சூத்திரம் வகுக்க வேண்டும் என்கிறார் போகர். கண்ணாடி கை தொலைநோக்கி, புரட்டிப்போடும் நடுக்கடல் டைஃபூன், பாதையில் மறைந்த பாறைகள், மூழ்கியுள்ள நவதாது அக்னி மலைகள் என பலவற்றை ஆய்வுசெய்த பிறகே சாகரத்தில் பயணிக்கவும், கடலடி பொக்கிஷங்கள் சேகரிக்கவும், scuba கவசத்தில் குதிக்கவும் மூச்சடங்கி இருக்கவும் யோசிக்க வேண்டும் என்கிறார்.
அங்கே உஷாராக இருக்கவேண்டும் என்று ஆனானப்பட்ட சித்தரே மிகுந்த எச்சரிக்கையுடன் தன் சாதனைகளைச் செய்தார் என்றால் நம் என்ஜினியர்கள் எம்மாத்திரம்? Adventure tourism முன்பதிவு செய்து 13000 அடி ஆழத்தில் போய் உயிரைவிட தலைக்கு டிக்கட் விலை என்ன? $250000. 🤔
- எஸ்.சந்திரசேகர்
கருத்துகள் இல்லை:
கருத்துரையிடுக