பாதாள நரகம்!

எனக்குத் தெரிந்த ஒரு கிழவி அண்மையில் தன் 95வது வயதில் மாண்டாள். அவள் இருந்தவரை தன் மகளுடன் கூட்டு சேர்ந்து தன் மருமகளுக்கு சொல்லொணா துயரங்கள் தந்தாள். அக்கிழவியின் குணத்தை அவள் மகனும் ஆதரித்ததுதான் கொடுமை. ஒரு கட்டத்தில் மருமகளை வீட்டை விட்டு துரத்தியும் விட்டாள். காலம் முழுக்க கிழவி பிரச்சனையாகவே இருந்தாள். அவள் எங்கே உள்ளாள் என்பதை அதிகாலை கனவில் பார்த்தேன்.

அவளை யாரோ புதைக்குழிக்குள் இழுப்பதும் அவள் வாய் மூக்கு காது எல்லாம் மண் அடைத்து, கீழே இழுக்கப்படுவதைக் கண்டேன். அவள் என்ன ஆனாள் என்று பார்க்க பாதாள உலகம்வரை பயணித்தேன். அங்கே ஒரு தடாகம் இருக்க சிறு சுறா ஒன்று என் முன்னே வந்து நின்றது. அது தன் வாயை எனக்குத் திறந்துகாட்ட, அங்கே மேல்/ கீழ்த்தாடை கூர் பற்களுக்கு இடையே இக்கிழவி சிக்கிக்கொண்டு திணறுகிறாள். என்னைப் பார்த்ததும் 'நானே விருப்பப்பட்டுத்தான் இங்கே வந்தேன்' என்றாள். உடனே சுறா மீன் போய்விட்டது.

கெத்துதான்! அக்கிழவி இப்படிச் சொன்னது எனக்கு நகைச்சுவையாகவும் ஆச்சரியமாகவும் இருந்தது. ஆனால் நாம் புரிந்து கொள்ளவேண்டியது என்ன?

"பாபஞ்செய் யாதிரு மனமே - நாளைக்
கோபஞ் செய்தே யமன் கொண்டோடிப் போவான்
வேத விதிப்படி நில்லு - நல்லோர்
மேவும் வழியினை வேண்டியே செல்லு"

பாவங்கள் செய்வதால் அல்லல்பட்டு இறக்க நேரிடும், அந்த ஊழ்வினைக்கேற்ப பிறவிகள் துரத்தும், யமன் துரத்துவான். இப்படியே இந்த ஓட்டம் தொடரும். கோபத்தையும் அதன் காரணிகளையும் விட்டொழித்தால் பிறப்பு-இறப்பு அறுபடும். வேதம் உரைத்த தர்மநெறிப்படி வாழ்ந்தால் மேன்மையான இடத்தை அடையலாம் என்ற கடுவெளி சித்தர் பாடல் என் நினைவுக்கு வந்தது. சொர்க்க/ நரக பதியில் என்ன நடக்கிறது என்பதை பார்த்த குருநாதர் போகரும் இதையேதான் வலியுறுத்தியுள்ளார்.

Divine photo 4

At the Naga-Valli நாகவல்லி ritual function of the wedding, when I clicked, a naga sarpam appeared in the flame with a long projecting split tongue. This homam is done in the afternoon, to propitiate nagadevas and purify the generation without any sarpa dosham. This ritual is widely followed by smartha brahmins of Andhra and Karnataka.

Miniature models from the kitchen

Here you see a plate full of sugar dolls in different shades and waxy tiffin snacks. A special thamboolam is also at sight. Thanks to my cousin Prema whose hard work had made it realistic.

புது தம்பதி

ஓரினச் சேர்க்கை LGBT சம்பந்தமாக ஒரு தீர்ப்பைக் கொடுத்து பரபரப்பை ஏற்படுத்திவிட்டது உச்ச நீதிமன்றம்! இனி ஊரெல்லாம் ஒற்றைத் தோடு படு ஜரூராக வியாபாரமாகும். ஆங்காங்கு முகநூல் வாட்ஸப் பக்கங்களில் ஆண்களின் வலதுகாது பளபளக்க நிறைய படங்கள் பதிவேற்றம் ஆகிறதாம். மறைவாக செயல்பட்டவர்கள் இனி பகிரங்கமாக உலா வருவார்கள். புறத்தே ஒன்றுமாக, அகத்தே ஒன்றுமாக உருவம்கொண்ட மனிதர்களை நாம் ஒன்றும் சொல்வதற்கில்லை. 'ஒரே குலம் ஒரே இனம்' 'சுதந்திர சுவாசம்' என்று பதாகைகள் ஏந்தி கொண்டாடிய தம்பதியர்கள் அதிகம் இருந்தனர். நேற்றைய டிவி செய்தியில் இதுதான் பிரதானம்.

வாசிக்கலை, நினைவாற்றல், மருத்துவ வர்மம் செயல்பாட்டிற்கு இரு காதுகளிலும் ஆண்கள் கடுக்கன் போட்ட காலம் மலையேறிவிட்டது. ஒற்றைக் காதில் மட்டும் கடுக்கன் /தோடு அணியக்கூடாது என்பது விதி.

அமலுக்கு வரும் புதிய சட்டத்தைக் கொண்டாடும் பிரஜைகளுக்காக ஒரு திருமண வாழ்த்து மடல்.

"ஆணும் ஆணும் நித்திய சிரஞ்ஜீவியாய்
பெண்ணும் பெண்ணும் சுமங்கலியாய்
காணும் ஓரினத்தில் தம்பதி சமேதமாய்
பூணும் வாழ்க்கையில் நீடூழி வாழுங்கள்."

சூட்சுமம் உணராதோர்

கேரளாவில் கடும்வெள்ளம் ஏற்படும் என்று போன வருடமே ஒருவர் கோள்களின் சஞ்சாரம் மற்றும் பஞ்சாங்க சூத்திரங்களை வைத்து கணித்திருந்தார். அதற்கெல்லாம் சாத்தியமில்லை என்று வானிலை ஆய்வு மையம் அப்போது மறுத்தது.

அண்மையில் அனைத்து வயது பெண்களும் 'சுத்தபத்தமாக' தங்கள் சௌகரியம்போல் சபரிமலைக்கு செல்லலாம். 12-50 வயது பெண்களுக்கு இனி கட்டுப்பாடில்லை என்று உச்சநீதி மன்றம் ஆணை பிரப்பித்தது. இன்றைக்கு எல்லோரும் கல்வியில் முன்னேற்றம் கண்டுவிட்டதால் கோள் என் செய்யும், கடவுள்தான் என் செய்யும் என்ற மூட தத்துவம் பேசி வருகிறார்கள். இவற்றை இன்னும் பின்பற்றுவது சரியில்லை என்பார்கள். ஆக, பக்தியும் உண்டு சிலசமயம் நாத்திகமும் உண்டு என்பதுபோல் சூழல் அமைந்து வருகிறது. அதை மீறிப்போனால் சாதிகள், அடக்குமுறை என்று பிரச்னை எழுப்புவார்கள்.

கேரளாவில் பாதுகாப்பற்ற அணைகளும், பராமரிப்பில் அக்கறைக் காட்டாத பொதுப்பணித் துறையும் இருப்பதால் இந்த அளவுக்கு வெள்ளச் சேதம் ஆகியது. இதில் ஆருடமும் ஐயப்பனும் எப்படி வரும்? என்று சுப்ரதீபமாக பேசும் கூட்டமும் உண்டு.

கேரளாவில் நடந்த பேரிடர் போனவருடம் கணித்த ஆருடத்தாலா? ஐயப்பனின் கோபத்தாலா? கேரள பொதுப்பணித் துறையின் அலட்சியத்தாலா? காக்கை உட்கார பனம்பழம் விழுந்த கதைதான் என்று சிம்பிளாக சொல்லிடலாம். காக்கை உட்கார பனம் விழவேண்டும் என்பது விதி.

மேற்கூறிய எல்லாமே ஒருங்கே நடந்தது. அதுதான் கடவுளின் சித்தம். பஞ்சபூதனின் சூத்திரத்தை அறியாதோர் எல்லாம் பேசுவார்கள். செரித்த உணவும் குடித்த நீரும் மலமும் சிறுநீருமாக பிரிந்து வெளியேறும் என்பது சரீர விதி. உணவு செரிக்க நெட்டை குட்டை, பணக்காரன் ஏழை, புத்திமான் முட்டாள் என்ற பாகுபாடு ஏதுமில்லை. மணமுள்ள உணவை சக்தியாக மாற்றி, துர்நாற்றமிக்க மலத்தை வெளியே தள்ளவும் உடலுக்கு எப்படித் தெரியும்? குடலில் இதை யார் பிரிக்கிறார்கள்? பிரியாவிட்டால் என்னவாகும்? உணவு உண்டு செரித்து சத்துகள் கிரகித்து அதை உடலுக்கு சக்தியாகித் தருவது யாருடைய வேலை? தன்னிச்சையாக நடப்பதா? இதற்கு விடை தெரிந்தால் அவனவன் வாயை மூடிக்கொள்வான்.

வெள்ளம் அங்கே வீண்பழி இங்கே!

Sri Varalakshmi

வரம் தரும் மகாலக்ஷ்மி, ஸ்ரீ வரலக்ஷ்மி 

தெரிந்த சங்கதிதான்!

"இப்படி இரு அப்படி இரு. மும்மலங்களை நீக்கு, நல்ல மனதோடு இரு. கெட்ட குணம் கூடாது, உற்றுப்பார்த்து மெய்ப்பொருள் அறிந்துகொள். உன் குருவை உணர உனக்கு ஞானம் வேண்டும். பற்று இல்லாமல் இரு, அழிவுப்பாதைக்கு இட்டுச் செல்லும் குணம் கூடாது. நல்லவனாக இரு."

எத்தனை வேதாந்திகள் எத்தனை உபதேசங்கள்! இப்படி ஆளாளுக்கு சொல்வதை எல்லாம் யார் செவி கொடுத்து கேட்பது? நான் யாரையும் கிண்டல் செய்வதாய் நினைக்கக்கூடாது. மேலே சொன்னவை எல்லாமே எல்லோரும் அறிந்த விஷயங்கள்தான். ஆன்மிகம் என்பது அனைவரிடமும் உள்ளொளியாய் இருப்பதுவே. அதை கர்ம வினையின் பலன்கள்தான் திரையிட்டு மறைத்து அஞ்ஞானியாக வைக்கிறது.

ஆன்மிக அன்பர்கள் உபதேசித்தபடி எல்லாம் நாம் கற்று அதன்படி இருக்கமுடியுமா? நாளை என்ற கவலை எல்லோர் மனதிலும் மேலோட்டமாகவோ ஆழ்மனதிலோ இருக்கும். அதை முதலில் எப்போது களைவது? அந்த அச்சம் போனால்தான் மற்றவை கைக்கூடும். வாழ்க்கையில் இதெல்லாம் சௌகரியமாக இருந்தால் மற்ற நெறிகளும் ஆன்மிக பற்றும் தன்னாலே வரும். அவன் எப்போது சாதிப்பது? ஏதோவொரு பிரச்சனை அவனுக்கு வந்துக்கொண்டே இருக்கும். அகக்கடல் எப்போது அடங்குவது? எல்லோருமே சுயம்புதான்! தக்க நேரம் வந்தால்தான் அவன் தன்னை உணர முடியும். தனக்கும் தன்னை சார்ந்தவர்களின் எதிர்கால தேவைகளை பொருளீட்டி பூர்த்தி செய்யவேண்டி இருப்பதால் விசாரங்கள் வந்து வாட்டும். சொத்து சுகம், நிலம் வீடு எல்லாம் சேர்த்து வைத்து, ஓய்வூதியமும் பெற்று மலையடிவாரத்தில் ஒரு ஆசிரமம் நிறுவி செட்டில் ஆகிவிட்டு, 'வாங்க, கடவுளை உணரலாம்!' என்று சொல்லி காலத்தைக் கழிக்க எல்லோராலும் இயலாது. அங்கு உட்கார்ந்தபடி உபதேசம் செய்வது அனைவருக்கும் எளிதே!

பற்றற்ற நிலையை கைக்கொள்ளவும் குருவை உணரவும் ஞானியாகவும் தக்க சமயம் வரவேண்டும். என்னதான் பக்திமானாக வேதாந்தியாக ஆசிர்வதிக்கப்பட்ட அருளாளராக இருந்தாலும், அவனும் மனிதனே! அவனுடைய ஆழ்மனம் அமைதியுற்று தன் புறச்சூழலில் நடக்கும் எதுவும் தன்னை பாதிக்காமல் இருக்குமாறு வைத்துக்கொண்டு தினமும் இயங்கினால்தான் மனம் தெளிவடையும். ஆன்மிகத்தில் உயர்நிலையை அடையவேண்டும் என்றால் அது தன்போக்கில் எந்த உந்துதலும் இல்லாமல் தானே நடக்கும். அதுவரை மந்திரம் தந்திரம் உபதேசங்கள் எல்லாமே வீண்தான். பக்தி நம்பிக்கை பொறுமை, இவைதான் முக்கியம்!

கோடிக்கரையில் பூங்குழலியின் கானம் பலபொருள் கொண்டு கல்கியின் புதினத்தில் நம் காதுகளில் ஒலிக்கிறது.

"அலைகடலும் ஓய்ந்திருக்க அகக் கடல்தான் பொங்குவதேன்?
நிலமகளும் துயிலுகையில் நெஞ்சகந்தான் பதைப்பதுமேன்?"

ஆடியில் வளை அலங்காரம்

ஆடியில் வண்ணவளை ஆடைச் சாற்றி 
அடியார்கள் பரவசித்து உற்று நோக்கி
தோடியில் சாமரமாய் பண்ணிசைக்க
திகட்டாத அழகம்மை கொலுவிருக்கும்
நாடியில் உறைகின்ற வாலைப்பெண்ணே
நயமாக சக்கரங்களை இயக்கும் சக்தியே
பாடியில் அருளும் திருவலித அம்பிகையே
பதமலர் போற்றினேன் வல்லீசர் நாயகியே! 

ஜலப் பிரளயம், ஒரு பாடம்

பஞ்சபூதங்களை உரிமைக் கோரலாமா? கூடாது. அது எல்லோரும் ஜீவித்து வாழ்வதற்காக உள்ளது. கடந்த ஒருவாரமாக அண்டை மாநிலமான கேரளா படும் இன்னலைப் பார்க்கும்போது இருவேறு உணர்வுகள் மேலோங்கும். ஒருபுறம், 'தமிழ்நாட்டைவிட சின்ன மாநிலம். ஐயோ, இத்தனை மழை வெள்ளத்தை அது தாங்குமா?' என்றும், இன்னொருபுறம் 'எல்லா நதிநீரும் தனக்கேனு சொல்லி அணைகள் கட்டிச்சே!' என்று ஏளனமும் வரும்.

உண்மையில் இத்தனை அணைகள் தேவையா? தேவையில்லை. தரை மட்டத்திலுள்ள ஏரி தாங்கல் குளம் கண்மாய்கள் நிரம்பினாலே போதும். அதெல்லாம் தாண்டி எங்கேனும் நதி பெருக்கின் கட்டுப்பாட்டை சீராக்க அணை வேண்டும். மூன்று ஜில்லாவுக்கு ஒன்று என்ற அளவில் சிறிய தடுப்பணைப்போல் இருந்தாலே போதும். பூமிக்கு மேலே சுவர் எழுப்பி நீர் தேக்குவதற்கும், பூமிக்கு சமன்பாட்டில் நீர் தேக்குவதற்கும் நிறைய வேற்றுமை உண்டு. கரிகாலன் தன்னிடம் இருந்த படைபலம்கொண்டு பல அணைகளை கட்டியிருக்கலாம். ஆனால் செய்யவில்லை. உறுதியாக, எளிமையாக, பயன்பாட்டுக்குத் தக்கபடி கல்லணை ஆயிரம் வருடங்களைக் கடந்து கம்பீரமாக உள்ளது.

இடுக்கி அணைபோல் நீர் தேக்கி வைக்க அதி பயங்கர அணை ஒன்று கேரளாவுக்குத் தேவையில்லை. இயற்கையானது உடனே தன்னுடைய எதிர்மறை போக்கைக் காட்டாது. ஒரு தலைமுறை காலம் எடுக்கிறது. கேரளாவில் நடந்ததும் அப்படியே. குறவன்- குறத்தி மலைகளுக்கு குறுக்கே மத்தியில் சுவர் எழுப்பி, 550 அடிக்கு நீர் தேக்கும் கிண்ணமாக வைத்ததுதான் தவறு. அப்படியே கட்டினாலும் 200 அடி போதுமென கட்டியிருக்கலாம். நீர்தக்கத்தின் உயரம் கூடக்கூட புவியழுத்தத்திலும் பூகோள தட்டுகளின் ஸ்திரமற்ற போக்கு அதிகரித்தது. பேராசை பெரு நஷ்டம்! அங்கு மழை வெள்ளம் அடித்தால், தமிழகத்தில் வலிக்கும். அதுதான் இயற்கையின் நீதி. ஏதோ தமிழகத்தில் வெள்ளப் பேரிடர் நடந்ததுபோல் இங்கு நம்மூருக்குள் பாயும் நதிகள் எல்லாமே பெருக்கெடுத்து பொங்கி ஓடுகிறது.
எல்லா நதிகளையும் இணைக்கும் திட்டம் வந்தால் கடல் முகத்திலுள்ள நமக்கு அது அனுகூலமா ஆபத்தா என்பதை நீங்களே கற்பனை செய்து பாருங்கள். பல கிராமங்கள் மூழ்கியதால் மீட்பும் நிவாரணமும் நடக்கிறது. நம் மாநிலத்தில் எல்லா நீர்நிலை வழிகளும் கச்சிதமாக பராமரிக்கப் பட்டிருந்தால், கடைமடை பகுதிவரை இண்டு இடுக்கு நீர் நிலைகள் நிரம்பி, பூமி கிரகித்ததுபோக எஞ்சியது எல்லாமே தன்னிச்சையாகவே கடுலுக்குப் போயிருக்கும். நமக்கும் நிறைய தடுப்பணைகள் கட்ட அவசியம் இருக்காது. மணல் திருடியதால் சமனற்ற நதிப்படுகையே உள்ளது. ஆனால் பல நீர்நிலைகள் பதிவு ஆவணங்களில் இன்றும் இடம்பெற்றுள்ளன, பூகோளத்தில் இல்லை. நாம் சுயமாக பாடம் கற்க இதோ டிசம்பர் மாதம் வருகிறது.

'கலியுகத்தில் கடுங்குளிர், புயல், கடும்வெப்பம், கனமழை, உறைபனி, வெள்ளம், பூகம்பம் போன்ற பல இயற்கை பேரிடர்களில் சிக்கி மக்கள் தவிப்பார்கள். இதனால் பசி, தாகம், நோய், பயம், சச்சரவு போன்ற கடும் துன்பங்களில் சிக்கி இறப்பார்கள்' என்கிறது பாகவத புராணம்.